Прававая дапамога і асвета. У Шчучынскім раёне прайшоў прафсаюзны прыём грамадзян
Чарговы прафсаюзны прыём грамадзян адбыўся на базе Шчучынскага раённага аб'яднання прафсаюзаў і СШ № 1 горада Шчучына. Яго правялі галоўны прававы інспектар працы Гродзенскай абласной арганізацыі Беларускага прафсаюза работнікаў адукацыі і навукі Наталля Грэцкая, старшыня раённага аб’яднання прафсаюзаў Юрый Пашук і пракурор Шчучынскага раёна Алег Вялічка.
Як адзначыў Юрый Пашук, падобныя прафсаюзныя прыёмы праводзяцца згодна з палажэннем Федэрацыі прафсаюзаў Беларусі, а парадак іх правядзення ўключае ў сябе дзве часткі. Спачатку прыём грамадзян ажыццяўляецца па месцы знаходжання раённага аб’яднання прафсаюзаў. Пасля праводзіцца сустрэча з працоўнымі калектывамі ў арганізацыях і на прадпрыемствах нашага раёна. На гэтых сустрэчах асвятляюцца важныя і актуальныя грамадска-палітычныя тэмы, праводзіцца прававая адукацыя насельніцтва.
Гэтым разам падчас прафсаюзнага прыёму грамадзяне цікавіліся пытаннямі налічэння пенсіі па інваліднасці, нюансамі афармлення працоўных адносін па сумяшчальніцтву і рэгламентам арганізацыі перапынкаў для прыёму ежы падчас працы.
Пасля прыёму грамадзян у раённым аб'яднанні прафсаюзаў на базе СШ № 1 горада Шчучына адбылася лекцыя па прававой адукацыі, на якой сабраліся прадстаўнікі з розных навучальных устаноў. Са зменамі ў Працоўным кодэксе, якія ўступілі ў сілу з 1 студзеня 2024 года, прысутных азнаёміла Наталля Грэцкая. У сваім выступе яна звярнула вялікую ўвагу на новыя нюансы прадастаўлення працоўных адпачынкаў.
– Адбылося дастаткова шмат змен у Працоўным кодэксе, – адзначыла Наталля Грэцкая. – Што тычыцца працоўных адпачынкаў, то на сёння заканадаўствам працяг водпускаў вызначаецца на дату іх выдачы. Гэта азначае, што работніку даецца адпачынак той працягласці, якая пазначана ў канкрэтнай працоўнай дамове кожнага работніка. Калі працоўны адпачынак даецца не па графіку, а згодна з заявай, то работнік можа пазначыць у ёй, што ён згодны атрымаць сярэдні заробак (адпускныя) не пазней, чым за два дні з пачатку працоўнага водпуску.
Пасля абмеркавання галоўнай тэмы ўсе жадаючыя ў індывідуальным парадку змаглі звярнуцца да спецыялістаў з асабістымі пытаннямі, атрымаць кваліфікаваную юрыдычную кансультацыю і прававую дапамогу.
Алег ШЫШЛОЎСКІ.
Фота аўтара.